Diversitad - Art a Sagogn 13-08 tochen 16-08-2020
Exposiziun a Sagogn
13 tochen 16 d’uost 2020 en casa pervenda catolica
20 onns ein vargai dapli la davosa gronda exposiziun a Sagogn.
In motiv per l’uniun Pro Sagogn da revitalisar la tematica dalla lavur creativa indigena en nies vitg. Suenter ina fasa da planisaziun d’in onn, cun biaras sentupadas inspirontas cun carstgauns creativs ed aultmotivai da Sagogn ni cun ina stretga relaziun culla vischnaunca, astgein nus arver las portas dall’exposiziun. Quella entscheiva gievgia, ils 13 d’uost 2020, allas 19.00, culla vernissascha.
Ils quater gis d’exposiziun vegnan las visitadras ed ils visitaders menai silla tura digl art, tras la cuort e sper pistrin e clavau ora, tras tschalèr e zulèrs dalla casa pervenda tochen ella sala dalla pleiv. Suenter meina la tura puspei anavos ella cuort nua ch’il caffè d’art envida da seser in mument e guder.
Silla tura vegnan ins ad entupar las ovras dad 11 artistas ed artists e mintga sera allas 19.00 astg’ins guder en in liug in concert cun musicists da Sagogn.
Uras d’avertura
gievgia, 13-8-2020, 19.00 – 21.00, vernissascha, cun apero
venderdis, 14-8-2020, 15.00 – 21.00
sonda, 15-8-2020, 15.00 – 21.00
dumengia, 16-8-2020, 13.00 – 17.00, 16.00 finissascha, cun apero
Nus selegrein d’entupar Vus, culla duida distanza e responsabladad necessaria, en quei temps special.
